O Goberno local permitirá novamente aos establecementos de hostalaría da cidade instalar caldeiros na vía pública para a venda de polbo con motivo das festas do San Froilán. A autorización estenderase do 3 ao 12 de outubro, datas nas que Lugo celebra a súa festividade máis emblemática.
Así o anunciou este martes o tenente alcalde de Lugo, Rubén Arroxo, quen destacou que esta iniciativa “ten moi boa acollida cada ano entre os profesionais da hostalaría” e lembrou que quen se somen á proposta deberán cumprir cunha serie de requisitos. Entre eles, garantir sempre o tránsito peonil na zona, respectar os accesos a vivendas, garaxes e locais comerciais, e asegurar a seguridade dos viandantes.
Así mesmo, os caldeiros deberán instalarse de maneira que non interfiran na circulación de vehículos e terán que estar debidamente protexidos para evitar calquera contacto directo do público cos mesmos. En caso de incumprimento da normativa, advertiu Arroxo, poderá ordenarse a retirada total ou parcial dos elementos que non se adapten ás condicións fixadas ou que supoñan algún tipo de perigo.
