A sección segunda da Audiencia Provincial de Lugo condenou, en base ao veredicto do tribunal do xurado de finais de maio, a un total de 26 anos de cárcere a José Uriel V.S. que foi xulgado polo asasinato de Cristina Cabo Buján en Lugo, unha muller de 42 anos que residía no barrio da Milagrosa e que rexentaba unha tenda de produtos ecolóxicos.
O acusado foi considerado polo tribunal popular autor dun asasinato e dun roubo con violencia (levou o computador e unha bicicleta da vítima). De feito, el mesmo confesou os feitos, aínda que a súa defensa pediu que fose condenado por homicidio e non por asasinato, para buscar unha pena de cárcere menor (de 15 anos fronte ao máximo de 30 anos do asasinato) e por un furto en lugar dun roubo violento.
Cristina Cabo Buján morreu na madrugada do 27 de novembro de 2022. Esa noite contactou co acusado nunha zona de lecer de Lugo e, posteriormente, ambos foron ao domicilio dela, onde mantiveron relacións sexuais consentidas. Nun momento dado, o acusado e a vítima iniciaron unha discusión, no transcurso da cal, José Uriel asestoulle 47 coiteladas. O home, de orixe colombiana e que levaba dous meses en España, foi delatado poucos días despois pola súa propia irmá, que o viu con manchas de sangue na roupa e en poder do computador e a bicicleta subtraídos á vítima.
ALEIVOSÍA E ENSAÑAMENTO
Durante o xuízo celebrado na Audiencia, a acusación solicitou que se recoñecesen as agravantes de aleivosía e ensañamento, circunstancias que o xurado viu probadas. Con todo, o tribunal popular non aceptou o argumento do acusado do trastorno mental ou da lexítima defensa, xa que José Uriel non presentaba lesións.
Na súa sentenza, a maxistrada sinala que o condenado “presentaba intacta a súa capacidade de entender e querer”, ao que engade que “a agresión co coitelo levada a cabo foi de tal violencia en atención á desproporción en forza física entre agresor e agredida, e a que esta estaba baixo a inxesta de bebidas alcohólicas e cannabis que, a pesar de que a vítima logrou opor resistencia fronte ao seu agresor, debido a estas circunstancias, foi ineficaz por mínima e, polo tanto, non impediu que o acusado acabase facilmente coa súa vida, asegurando a súa execución e evitando o risco que puidese provir dunha defensa efectiva da vítima”.
A maxistrada tamén engade que o xurado deduciu a intención de acabar coa vida da muller “polo número de feridas e as zonas vitais onde se atoparon”. Ademais, indica que concluíu “a inexistencia dunha previa agresión que posibilitase unha lexítima defensa”, pois o acusado carecía de “ferida, escoriación ou hematoma”, á vez que resalta que, de igual modo, o xurado “estimou que concorría a agravante de aleivosía e ensañamento, o que transforma a morte da vítima de homicidio a asasinato”.
A sentenza recolle a pena de 22 anos de cárcere polo asasinato e a de 4 anos polo roubo; ademais, o procesado será expulsado do país unha vez que acceda ao terceiro grao ou á liberdade condicional sen que poida regresar no prazo de 10 anos. Igualmente, a resolución establece, en concepto de responsabilidade civil, indemnizacións aos familiares de Cristina Cabo, que suman máis de 180.000 euros. Con todo, a resolución non é firme e pode ser recorrida ante o Tribunal Superior de Xustiza de Galicia (TSXG).
