Un día despois da concentración de familias e representantes de CC.OO. para reivindicar unha solución “definitiva” para a situación da escola infantil Gregorio Sanz de Lugo rexistrouse un paso: un decreto de Alcaldía subscrito pola rexedora, Paula Alvarellos, ratifica o cesamento da traballadora do centro tras cuxa reincorporación causaron baixa médica seis compañeiras.

O conflito laboral no centro remóntase a hai unha década atrás, pero as familias sufriron o impacto tras a baixa do seis traballadoras que habitualmente se ocupaban dos nenos escolarizados na Gregorio Sanz.

As baixas producíronse tras a reincorporación recente dunha compañeira (a que foi cesada) que anos atrás as denunciou por acoso laboral e, a tres delas, por malos tratos. O caso foi arquivado.

As traballadoras en cuestión, pola súa banda, tamén tomaron medidas a nivel administrativo e expuxeron as súas queixas (non só sobre a compañeira que as denunciou, senón tamén sobre persoal de cociña) ao comité de avaliación de acoso laboral do Concello, que, segundo a versión de CC.OO., deulles a razón e propuxo adoptar medidas.

O Concello, que sempre defendeu que a súa “prioridade” era o “normal” funcionamento do centro e que as baixas se cubriron, tamén avanzara que se activou un procedemento administrativo en busca dunha solución para a situación.

RESOLUCIÓN DO PROCESO ADMINISTRATIVO

Con todo, as familias pedían unha solución “definitiva” que permitise volver ás coidadoras habituais dos menores.

Así, o que reflicte o decreto da Alcaldía é que a traballadora (funcionaria interina municipal con categoría de técnico en xardín de infancia) cesa no seu posto despois de que a persoa á que substituía fose adscrita, definitivamente, a outro departamento. Dado que desaparece a praza, tamén o fai a substitución.