Os deputados do Grupo Provincial Popular finalizaron este martes as reunións cos alcaldes e portavoces do PP dos 67 concellos da provincia de Lugo, unha rolda na que recibiron as queixas dos rexedores polo “nefasto” estado do mantemento da rede viaria provincial.
O portavoz popular Antonio Meijide explicou que unha das reivindicacións “comúns” nestas reunións foi o estado das estradas de titularidade da Deputación, e fixo fincapé na “inseguridade” que supón circular por elas.
Neste sentido, esgrimiu que 66 dos 67 concellos da provincia reclamaron unha “preocupación real” por parte do goberno provincial respecto ao arranxo e mantemento das estradas, debido ás “numerosas deficiencias” que presentan.
“Estas estradas teñen que vertebrar a comunicación entre os municipios pero a realidade é que pola falta de traballo de José Tomé e os seus socios do goberno son un verdadeiro perigo”, afeou. Así mesmo, o PP de Lugo denunciou nunha nota de prensa que a “falta de mantemento” non se exemplifica só na rede viaria, senón que “tamén se traslada ao resto de propiedades” da Deputación de Lugo.
Un dos exemplos que trasladou é o estado do Pazo dos Deportes, das zonas verdes ou do Centro de Artesanía, xa que cando chove “faino coa mesma intensidade no interior e no exterior do edificio”.
Durante a reunión, os representantes dos diferentes concellos tamén fixeron patente a necesidade de que a Deputación poña en marcha un plan para a mocidade e que “colabore” cos municipios na recollida de animais abandonados coa creación de “tres centros de acollida”.
