A localidade luguesa de Guitiriz reuniu ás principais vilas termais galegas, que reivindicaron o potencial de Galicia, “principal destino termal de España” con máis de 300 mananciais.

O XVII Encontro de Vilas Termais concluíu na mañá deste sábado tras reunir ás localidades galegas do termalismo, baixo a organización da Sección de Entidades locais con Augas Termais, pertencente á Federación Española de Municipios e Provincias (FEMP) e presidida polo máximo responsable da Deputación de Ourense, Luís Menor.

As xornadas foron clausuradas polo conselleiro de Promoción do Emprego, Comercio e Emigración, José González, que destacou a actividade “dinamizadora” para o rural que supón o termalismo. Tras enxalzar unha actividade que “axunta tradición e modernidade”, González apelou a fomentar a colaboración público privada “para promover o emprendimiento e que Galicia progrese nun mercado laboral e inclusivo” apoiada en sectores como o do termalismo.

Pola súa banda, Luís Menor puxo o foco na importancia de organizar xornadas como as de Guitiriz, xa que permiten “coñecer importantes achegas desde distintas perspectivas e responsabilidades”. Nesta liña, apelou á cooperación entre os axentes implicados para avanzar nos obxectivos acordados na reunión de Guitiriz, á que tomará a substitución o próximo ano a localidade salmantina de Vega de Tirados.

Por parte da Deputación de Lugo interveu nas xornadas o deputado de Promoción Económica e Social, Pablo Rivera, que resaltou a “rica historia termal” de Guitiriz, que constitúe “o exemplo perfecto” do que poden ofrecer as augas galegas.