A Consellería do Medio Rural autorizou o cambio de actividade de forestal a agrícola de varias parcelas na parroquia de Maceda, no Concello de Palas de Rei, para unha explotación cárnica.
As parcelas están ocupadas por carballos, castiñeiros e bidueiros, que deberán ser tallados, ademais de realizarse rozas. O promotor demanda este proxecto pola necesidade de dispor de terras de prado e arables que lle permitan diminuír custos de alimentación dunha granxa de vacún de carne que ten en propiedade.
Estas leiras obxecto de cambio localízanse no lugar de Carreira, na parroquia de San Miguel de Maceda, a uns 4 quilómetros aproximadamente da capital do municipio, en dirección norte. Están a unha altitude duns 460 metros.
O proxecto foi sometido previamente a avaliación ambiental simplificada e o informe de impacto ambiental foi formulado de forma favorable o pasado mes de abril.
