Máis dunha decena de produtores de grelos da Terra Chá participan na 17ª Expogrelo do municipio lucense de Abadín. Esta feira combina a venda deste produto tradicional galego con postos de artesanía, música e outros produtos locais.

Alí, o director da Axencia Galega da Calidade Alimentaria, José Luís Cabarcos, puxo en valor a calidade dos grelos desta comarca e a animou aos produtores e comercializadores, tanto en fresco como en conserva ou conxelado, a que se inscriban no selo da Indicación Xeográfica Protexida (IXP) Grelos de Galicia.

Segundo destacou a Xunta, esta indicación xeográfica xerou en 2021 un valor económico estimado de 722.500 euros e comercializou máis de 364 toneladas de produto certificado. Así mesmo, subliñou que o produto amparado pola IXP é a parte vexetativa destinada ao consumo humano procedente de plantas da especie ‘Bassica rapa. L. var. Rapa’, comunmente coñecida como nabo.