A alcaldesa de Lugo, Lara Méndez, anunciou este martes que se abriu o proceso de licitación para crear un novo aparcadoiro gratis na contorna do Hospital Universitario Lucus Augusti (HULA) con 340 prazas.

Segundo indicou o Concello nun comunicado, o recinto ocupará dúas parcelas que, no seu conxunto, suman 11.510 metros cadrados. Así, sinalou que “coa premisa de maximizar o seu rendemento, a intervención procurará, na medida do posible, alterar de forma mínima o perfil topográfico do terreo”.

Deste xeito, os labores de acondicionamento terán un prazo de execución de catro meses e suporán un investimento municipal de 193.946 euros.

En relación aos accesos a esta área, Méndez avanzou que “se procurará unha entrada polo extremo Norte, a partir da vía asfaltada, colocando filas dobres de aparcadoiro en batería paralelas á rúa Doutor Ulises Romeu”.

Así mesmo, a rexedora local adiantou que o Concello solicitará unha autorización para colocar cámaras de vixilancia tanto no actual aparcadoiro como no que se construirá, co obxectivo de incrementar a seguridade.