CSIF denuncia que a PAC de Vilalba estivo “desatendido” o sábado ao saír por unha urxencia o médico que traballaba

Incidiu en que os directivos de garda do Servizo Galego de Saúde "coñecían" a incidencia e "non adoptaron medidas de reforzo" do persoal para solucionala.

PAC de Vilalba, onde foron atendidos dous dos tres familiares intoxicados por gas en Carballal | Leopoldo Alonso Lamberti
PAC de Vilalba, onde foron atendidos dous dos tres familiares intoxicados por gas en Carballal | Leopoldo Alonso Lamberti

A Central Sindical Independente e de Funcionarios (CSIF) Galicia denunciou a “desatención” que sufriron os pacientes da PAC de Vilalba o pasado sábado, durante a quenda da tarde, ao quedar sen médico dado que o único facultativo que estaba a traballar viuse obrigado a saír por unha urxencia domiciliaria.

O sindicato lembrou que a PAC, que dá cobertura a cinco municipios, debe ter dous facultativos en persoal. Con todo, apunta que o pasado sábado quedou ao cargo un só médico para atender a quenda da tarde.

Unha situación que provocou –sostén nun comunicado– “a desatención” dos usuarios durante o desprazamento de urxencia do médico a un domicilio.

Así mesmo, a central sindical cualificou de “irresponsable” que se produzan este tipo de casos e incidiu en que os directivos de garda do Servizo Galego de Saúde (Sergas) “coñecían” a incidencia e “non adoptaron medidas de reforzo” do persoal para solucionala.