A Sección Galega da Sociedade Española de Estudos Clásicos inicia este martes 8 de marzo a Mostra de Teatro Clásico de Lugo, que se celebra dende o ano 2001 na cidade da muralla. Desta volta as representacións teatrais virán da man da reivindicación, pois na primeira xornada lerase un manifesto a favor do mundo clásico, co que se dará inicio a unha serie de mobilizacións polas redes sociais, coas que se pretende chegar a toda a sociedade, para facer ver a omnipresenza do latín, do grego e da cultura clásica en xeral.
“O nome da campaña, SOS Clásicas, deixa en evidenza a situación na que se atopa
actualmente a ensinanza das mal chamadas linguas mortas na educación secundaria”, explican dende a sociedade.
“Cada vez son máis os centros escolares nos que se prescinde destas materias por seren consideradas “pouco útiles”, algo que, aos ollos destes apaixonados profesores e profesoras é un grave erro, pois acaba por derivar no descoñecemento do mundo que nos rodea”, denuncian.
O coñecemento clásico está presente no dereito, na bioloxía, na medicina, na arte e en tódolos eidos da vida, algo que se verá a través de varios vídeos e outros contidos que
se irán expoñendo a través das redes sociais durante as vindeiras semanas.
Para a campaña contan coa presenza de xente anónima que narra a utilidade do
coñecemento do latín ou do grego no seu día a día e na súa profesión. Tamén se suman a esta varias personalidades do mundo da cultura que queren poñer o seu gran de area nesta reivindicación.
Xornalistas, avogados, escritores, biólogos, médicos ou músicos narran en primeira persoa como os mitos, a etimoloxía ou os latinismos forman parte do seu día a día e serían moito máis complicados de entender se non tivesen cursado aqueles materias hoxe consideradas “pouco útiles”.
A demanda de fondo, por parte do profesorado, é a de conseguir a revalorización e o
respecto que o mundo clásico merece. E queren lembrarnos que, nestes tempos de incertidume que nos tocaron, o que nos mantén vivo o corpo seguramente sexa a ciencia,
pero as humanidades son as que nos manteñen viva a alma.
PRESENTACIÓN
A concelleira de Cultura, Turismo e Promoción da Lingua, Maite Ferreiro, presentou a XXII edición da Mostra de Teatro Clásico, que este ano aumenta a súa programación ata chegar ás 12 obras que encherán o Auditorio Municipal Gustavo Freire de cultura de calidade durante o mes de marzo.
“Quixemos facer unha programación extensa, de calidade e para todos os públicos”, explicou Maite Ferreiro, que engadiu “continuamos a concentrar a mostra no mes de marzo, facilitando a afluencia do público e a difusión da programación de Teatro Clásico”.
