Un gran despregamento policial custodiou a Ana Sandomil, acusada pola morte da súa filla Desirée Leal, ata a Audiencia Provincial de Lugo, onde este martes se celebra a segunda sesión, con xurado popular, para xulgar este crime.
Unha decena de axentes da Policía Nacional abrían paso, xunto a media ducia de axentes da Garda Civil do Servizo de Intervención Rápida (SIR), que tiveron que conter a algúns familiares que increpaban á presunta asasina ás portas do xulgado.
Sandamil era recibida ao berro de “asasina”, “mala bicha”, “filla do demo” e “filla de puta“, á vez que clamaban para que non se ocultase baixo a máscara e un anorak que apenas lle mostraba o rostro.
Entre varios axentes levárona polo aire ata a Audiencia Provincial, tratando os axentes de suxeitar a algúns dos que se apelotonaban na praza de Avilés e proferían improperios contra a acusada do crime da nena de sete anos, ocorrido na noite do 2 ao 3 de maio 2019.
“FACERSE A VÍTIMA”
Previamente, o pai de Desirée, José Manuel Leal, criticou sobre a declaración da súa exmuller que “o papel era o esperado, de facerse a vítima”. “Cando se lle preguntaba polo feito concreto non se acordaba de nada, pero acordábase de todo o demais de días anteriores e días posteriores, que non estaba privada das súas facultades mentais”, afeou sobre a declaración do pasado luns.
Tamén censurou o que testemuñou a avoa materna “onde di que ela non viu á súa propia neta con sangue, nin coa boca esnaquizada, pero aí están as fotos que sacou a Garda Civil para ver o estado da nena”.
“Chegouse a dicir que eu maltrataba á nai, e estamos a falar que facía catro anos que non estabamos xuntos e que ela tiña xa a súa parella”, subliñou.
Interpelado sobre se considera isto como “violencia vicaria”, que perseguiría co crime facerlle dano a el, non dubidou que así é. “Por suposto”, sentenciou. E argumentouno porque el mesmo “falara de ter a custodia compartida, pero ela era moi posesiva. “Foi por iso polo que o fixo, téñoo clarísimo”. “Foi consciente do que fixo porque foi cun ensañamiento enorme”, agregou.
As tres acusacións piden a prisión permanente revisable para Ana Sandamil que na súa declaración do luns, na sección segunda da Audiencia Provincial, negou os feitos.
