O presidente da asociación que agrupa aos directores de centros públicos de Lugo, José Manuel Valcárcel, recoñeceu que o curso en secundaria comeza este mércores con “máis tranquilidade” que o ano pasado, pero tamén advirte do perigosa que pode resultar “a relaxación social” á hora de adoptar as convenientes medidas de prevención fronte ao coronavirus.

En declaracións a EFE, fixo referencia á experiencia da comunidade educativa como un elemento importante para comezar o novo curso “con máis tranquilidade” nos centros, porque “todo o mundo” coñece xa “o protocolo” de seguridade, que segue en vigor.

De feito, precisou que as variacións “son mínimas” en relación coas medidas de seguridade adoptadas nos centros durante o curso pasado, con algunha diferenza, como que baixa a distancia de separación entre os alumnos de 1,50 metros a 1,20.

En todo caso, non ocultou a súa preocupación polas consecuencias que se poden derivar “da relaxación social” fronte ao coronavirus, por mor “dese cansazo pandémico” que provocou meses de “restricións severas”.

“A pandemia segue. Os contaxios seguen”, dixo, polo que pediu que se sigan mantendo as coñecidas medidas de precaución, porque “non queremos unha nova onda”. “Prevención e respectar o protocolo“, insistiu Valcárcel, quen opina que esa atención ás normas das autoridades sanitarias é a “mellor opción posible” para preservar a saúde de todos, de alumnos e de persoal docente.