A alcaldesa de Lugo, Lara Méndez, acompañada do novo concelleiro de urbanismo, Álvaro Santos, e o técnico e autor Jesús Martínez, presentaron un ‘catálogo de solucións ao deseño urbano GUD Lugo’, proxectado como ferramenta para combater tamén o cambio climático. Esta é unha “ferramenta” que pon en marcha o Consistorio, no marco do proxecto ‘Lugo +Biodinámico’, cuxo custo ascende a máis de 54.000 euros.
Méndez explicou que se trata “dun catálogo de solucións urbanísticas sustentables, e o que se pretende é mellorar o benestar da contorna”. Así, no documento “recóllense innovadoras solucións sustentables, nas distintas escalas de intervención urbana; rúas, barrios, urbanizacións, edificios, espazos públicos. O documento está elaborado dentro da estratexia Lugo máis biodinámico”.
“Será un referente non só en España senón tamén no ámbito europeo, porque cada unha das solucións urbanísticas que achega e inclúe son formuladas para calcular a melloría que suporá a súa aplicación en termo de emisións contaminantes, consumo enerxético ou no CO2. Esta actuación é fundamental para a Unión Europea porque loita contra o cambio climático”, detallou a rexedora lucense.
A alcaldesa de Lugo precisou que o documento inclúe 51 solucións verdes que están agrupadas por materias como a xestión da auga, a accesibiliidade, a economía circular ou transversais.
