Investigadores do Campus de Lugo alertan de novas formas de contaxio da Covid entre animais

Un estudo subliña a relevancia de estudar os factores ambientais que poderían afectar a eventuais gromos futuros por coronavirus e outros microorganismos patóxenos.

Por

Redacción

14 Abril, 2021

2020_4_30_75119s740x — Micrografía electrónica de transmisión de partículas do virus SARS-CoV-2, illada dun paciente e con realce da cor, do Instituto estadounidense de Alerxia e Enfermidades Infecciosas (NIAID), en Hamilton | Fonte: Montana (Estados Unidos de América). NIAID - Arquivo

As transformacións das cepas da Covid 19 e o seu rápido contaxio están abrindo novos campos de investigación que van xa máis alá dos factores humanos e apuntan tamén a factores medioambientais. De feito, así o recolle un recente estudo de investigadores galegos -con participación do Campus de Lugo- no que se fai fincapé na necesidade de estudar as condicións ecolóxicas e, especialmente, os contactos entre animais e persoas, para evitar novas transmisións do virus.

Aínda que se realizaron investigacións previas para detectar e cuantificar o virus en varios tipos de materiais e superficies, estes investigadores consideran que se debe prestar maior atención á propagación do SARS- CoV-2 a través de aerosois, non só xa de persoa a persoa, senón tamén (principalmente pensando en eventuais mutacións futuras) ás transmisións entre especies de animais.

Un contaxio que se podería facilitar e aumentar a través das feces, vía oral, ou que afecten e modifiquen as características actuais da transmisión de aerosois ou transmisións mediadas por superficies sólidas ou líquidas. Ata o de agora téñense confirmado contaxio de determinados animais a humanos e viceversa, principalmente, de gatos e visóns.

Este estudo, “SARS-CoV-2 and other main pathogenic microorganisms in the environment: Situation in Galicia and Spain”, acaba de ser publicado no último número da revista Environmental Research. Está asinado por Raquel Cela-Dablancaa, Vanesa Santás-Miguel, David Fernández-Calviño, Manuel Arias-Estévez, María J. Fernández-Sanjurjo, Esperanza Álvarez-Rodrígueza e Avelino Núñez-Delgado pertencentes ás facultades de Ciencias da Universidade de Vigo e a Politécnica de Lugo da Universidade de Santiago.

Please wait while you are redirected...or Click Here if you do not want to wait.