A Deputación de Lugo realizou un cribado a case 200 traballadores do seu cadro de persoal, todos eles con resultado negativo en Covid-19.
Así o informou esta institución provincial nun comunicado, no que explica que desde o inicio da pandemia adoptou “todo tipo de medidas para previr novos casos de Covid-19” entre o seu persoal.
Por iso, a semana pasada realizou un cribado a 200 traballadores que consistiu nun test rápido de antíxenos con mostra de saliva, cuxo resultado se obtiña en 15 minutos despois da recollida da mostra.
Un 50 por cento do persoal dos diferentes departamentos da institución acudiu ao cribado para a detección do virus, indica a Deputación de Lugo.
Esta medida, puntualiza a institución, súmase á “loita do goberno provincial ante a pandemia para a protección do cadro de persoal e os veciños da provincia”. “A pesar dos resultados favorables neste cribado, nas dependencias provinciais seguiranse mantendo as medidas xerais de prevención, ventilando as oficinas e mantendo o uso obrigatorio da máscara”, concluíu a Deputación de Lugo.
