O Servizo Galego de Saúde (Sergas) prevé realizar un cribado poboacional no concello de Vilalba durante a vindeira fin de semana. Segundo declaracións do xerente da área sanitaria, Ramón Ares, de momento estase analizando a incidencia por grupos de idade para decidir a que mostra de poboación convidar a participar nas probas.

Ares detallou que unha vez se saiba a que grupos de idade dirixirse, decidirase o lugar onde se realizará o cribado e o número de equipos que se desprazarán ata alí. Do mesmo xeito, remitiráselles unha notificación vía SMS ás persoas comprendidas nese grupo poboacional. “O obxectivo é detectar positivos entre poboación asintomática para reducir a transmisión da enfermidade“, explicou Ramón Ares.

Dende o goberno local de Vilalba xa solicitaran ao Sergas un cribado específico para o persoal de servizos sociais e para os traballadores do comercio debido á elevada incidencia do municipio e á prolongación das restricións.