Catro mortes notificadas este mércores elevan a 648 os falecementos con COVID-19 en Galicia, de acordo cos datos da Consellería de Sanidade, que concretou que dúas das vítimas eran usuarias da residencia de maiores do Incio.
Trátase de dúas mulleres de 94 e 86 anos que, aínda que procedían do centro xeriátrico, atopábanse ingresadas no Hospital Universitario Lucus Augusti (HULA) de Lugo. Con estas, son nove as mortes relacionadas co brote da residencia, que tivo que ser intervida pola Xunta e que supera o centenar de afectados.
Ademais, informouse da morte dun home de 84 anos que estaba tamén ingresado no HULA e doutro home, de 82 anos, que se atopaba hospitalizado no Complexo Hospitalario Universitario da Coruña (CHUAC). En todos os casos, indican as mesmas fontes, as persoas falecidas presentaban patoloxías previas.
As mortes con COVID-19 subiron nas últimas semanas, co aumento dos brotes e os contaxios na Comunidade galega. Desde a ‘nova normalidade’ notificáronse un total de 29 decesos, o primeiro deles, o dunha muller o pasado 7 de agosto en Ourense.
