EFE | O goberno local de Lugo, a través da área de Benestar, Inclusión e Terceira Idade, creou unha canle de Youtube con contidos específicos para as persoas maiores do municipio, elaboradas por monitores especializados, para que poidan seguir facendo as actividades que realizaban nos centros de Convivencia, pero de forma telemática.

Segundo informou a concelleira responsable da área de Benestar, Olga López, os contidos desa canle, que leva por título ‘Acompañámoste’, foron elaborados polos monitores do servizo de Animación, despois de estudar as necesidades dos usuarios” que, de forma habitual, acudían aos centros de convivencia municipais.

“É unha iniciativa máis para atender a este colectivo”, dixo Olga López, e está “aberta a todo o público, porque a idea é que a maior parte das actividades que estaban a realizar os usuarios nos centros de Convivencia de maneira presencial se sigan facendo de forma telemática a través da web do Concello de Lugo”.

“Incluirá actividades físicas, de expresión corporal e plástica, alfabetización dixital, de estimulación cognitiva e de educación compensatoria, entre outras”, precisou a edil.