O presidente do Colexio Oficial de Farmacéuticos de Lugo, Alejandro Sánchez Pérez-Mel, chamou aos cidadáns a non facer “provisión” desmedida de medicamentos, porque “non vai ser necesario” ao estar as 183 farmacias da provincia “abastecidas e funcionando”. Avisaron de que o que empeza a escasear son as máscaras, as solucións hidroalcohólicas e as luvas.
Con todo, Pérez-Mel subliñou este mércores que “non hai ningún problema de desabastecemento de medicamentos” e asegurou que a situación “é normal”. Por iso, insistiu en pedir á xente “que non trate de amorear medicamentos” sen ton nin son.
QUE MEDIDAS SEGUIR NAS FARMACIAS?
Ademais, aproveitou para pedir á poboación que siga as recomendacións, como a separación dun metro ou metro e medio ou esperar fóra dos establecementos ata seren atendidos, xa que no interior “hai moita xente”. “Realmente estamos a ter un comportamento excepcional por parte da poboación, que está totalmente concienciada”, concluíu.
