O presidente da Asociación de Empresarios de Hostalaría de Lugo, Cheché Real, reclamou este mércores unha maior presenza policial na rúa ante a proliferación de roubos nos últimos meses no conxunto da provincia.
Real lembrou que xa mantiveron unha reunión coa subdelegada do Goberno na provincia, Isabel Rodríguez, “para expresar a preocupación do sector” con este problema. Estas subtraccións prodúcense, sobre todo, “de madrugada cando levan a recadación das caixas rexistradoras e das distintas maquinas que hai no establecemento”, explicou.
Unha “preocupación”, abundou, que vai en aumento porque, sinala Real, “non só rouban no establecemento propio de hostalaría, senón nas casas particulares dos propietarios”. “Entendemos que as forzas e corpos de seguridade do Estado cumpren co seu labor, detendo xente, pero entendemos que non é suficiente porque os roubos seguen acontecendo dunha forma alarmante“, alertou.
Por todo iso, os hostaleiros de Lugo van pedir reunirse de novo coa subdelegada do Goberno, co fin de trasladarlle a necesidade de que “haxa máis presenza policial” nas rúas.
