O Hospital Veterinario Rof Codina, vinculado á Facultade de Veterinaria do Campus de Lugo (USC), confirmou que no mes de setembro incorporará un novo acelerador lineal ao seu servizo de radioterapia. Este dispositivo acaba de ser instalado nas dependencias do Laboratorio de Radiofísica e procura mellorar a rapidez e precisión nos tratamentos.
As obras de instalación e montaxe, así como a posterior posta a punto e calibración do novo acelerador lineal obrigaron ao “cesamento temporal da actividade desenvolta polo Servizo de Radioterapia Veterinaria” do Rof Codina, segundo explicou a Universidade de Santiago de Compostela nun comunicado.
O primeiro tratamento aplicado polo Servizo de Radioterapia no Hospital Rof Codina, un “centro de asistencia médica veterinaria pioneiro en España”, foi no ano 2012 e, a partir dese momento, “outros moitos usuarios, animais de pequeno e mediano tamaño chegados desde distintas localizacións de Galicia, recibiron ese tipo de terapia”.
Segundo a Universidade de Santiago, o novo acelerador “mellora a rapidez e a precisión dos tratamentos, á vez que mitiga o risco de efectos secundarios nos animais que reciben este tipo de terapia”.
