Once centro educativos da provincia de Lugo súmanse ao proxecto de libro dixital (E-Dixgal) da Xunta de Galicia no vindeiro curso 2019/20. Así o recolle a resolución publicada pola Consellería de Educación, Universidade e Formación Profesional, segundo a cal oitenta colexios galegos implantarán este sistema.
O proxecto E-Dixgal, impulsado pola Consellería e a Amtega, púxose en marcha no curso 2014/15 en 84 centros educativos de toda Galicia. Daquela, un total de 2.300 alumnas e alumnos na etapa de educación primaria puideron iniciarse no programa. Coas novas incorporacións, o E-Dixgal chegará o vindeiro curso a 347 centros de ensino e a 27.000 alumnas e alumnos.
Os centros de primaria que se incorporen impartirán a totalidade das materias en modalidade dixital; mentres que os de secundaria farano en polo menos seis materias. Ademais, deberán asumir o compromiso de implantar este sistema no curso 2019/20 en 5º de educación primaria e/ou 1º da ESO. Tamén terán que estendela a 6º de primaria e/ou 2º da ESO no 2020/21, mantendo nos cursos seguintes o proxecto educativo dixital neste niveis.
No caso de Lugo, os centros que se adscriben ao programa na súa etapa de Primaria son os seguintes: o CEIP Plurilingüe Santa María (A Fonsagrada), o CEIP de Bretoña (A Pastoriza); o CEIP San Miguel de Reinante Barreiros (Barreiros); o CEIP Veleiro Docampo (Castro de Rei); o CEIP O Cantel (Foz); o CEIP Illa Verde (Lugo); o CEIP Álvaro Cunqueiro Mota (Mondoñedo); o CEIP Plurilingüe Monte Baliño (Pantón); o CEIP Terra Chá (Vilalba) e o CEIP Plurilingüe Pedro Caselles Rollán (Xove). Na etapa de Secundaria, este proxecto introducirao o IES Illa de Sarón (Xove).
Segundo a Consellería, estes centros disporán da conexión á rede axeitada e dos medios tecnolóxicos precisos na aula, tanto para o profesorado como para o alumnado. Así, contarán cun PC individual que poden usar en modo portátil ou a xeito de tableta. Ademais, terán acceso a unha contorna virtual con contidos gratuítos proporcionados pola Xunta e a un servizo Premium de Atención, Soporte e Acompañamento, que tamén poderán empregar as familias.
