A festa de recreación do pasado romano e castrexo da cidade de Lugo, o Arde Lucus, contará este ano 2019 con 380 actividades entre os días 14 e 16 de xuño. Previamente, o día 13 producirase a “entrada de tropas romanas” desde a ponte vella da cidade, ás 21,00 horas, e alí para a defensa da cidade toparanse con “tropas castrexas”.
No Vella Carcere foi presentada a festa, declarada de Interese Turístico Nacional, con membros das asociacións, 18 na cidade. A alcaldesa de Lugo, Lara Méndez, presumiu do Arde Lucus ao que situou “como un aceno de identidade, de orgullo e posta en valor do patrimonio”. “É o exemplo de como un movemento social pódenos levar todo o máis alto, como en 18 anos somos festa de Interese Turístico Galego, de Interese Turístico Nacional, en 18 anos de vida”, destacou.
Ademais, concretou que este ano chegan “case ás 400 actividades, 380, e isto vai ser imposible de superar, aparte todas elas con esa rigorosidade que caracteriza a esta festa de recreación histórica”.
A concelleira de Cultura, Carmen Basadre, que non puido reprimir a emoción na presentación, lembrou que pertencen “á asociación de festas e recreacións históricas”. “Estamos na Federación Europea de festas e reconstrucións históricas”, engadiu.
O Arde Lucus contará con preto de vinte lexións, asociacións, agrupacións ou tribos que nos van a visitar, entre elas están; Sagunto, a lexión de Arlex de Francia, de Italia, a federación de tropas de Cartaxena, Astorga, Portugal, terras cántabras, Xinzo de Limia, os dacios que por primeira vez van estar na cidade que son de Moldova, León, Ponte Umbría”, enumerou.
“LUGO POLO MUNDO”
Tamén interveu, o deputado provincial responsable de Relacións Institucionais, Álvaro Santos, que tamén se referiu ao Arde Lucus como “un símbolo de identidade, o que fai imperativo a colaboración da Deputación”.
Para eses días calcúlase, estimou Santos, pódese chegar “ás 600.000 persoas” que visiten a zona durante o 14, 15 e 16 de xuño con motivo desta festa que conxuga a presenza romana coa de castrexos nunha convivencia “perfecta”, concluíu.
