Lugo desfrutará da nova programación de xadrez en xuño, xullo e setembro na que se inclúen exhibicións, torneos sub 2200, xadrez na rúa e campamentos urbanos. Na presentación na Sala de Usos Múltiples de Novas Tecnoloxías, participaron Miguel Fernández, concelleiro de Deportes e Medio Rural do Concello de Lugo; Ana Abelleira, concelleira de Benestar Social, Igualdade e Inclusión; e Pablo Castro, presidente da asociación cultural Xaquedrum.
Miguel Fernández, concelleiro de Deportes do Concello de Lugo, reivindicou o xadrez coma “alternativa de lecer” e “en espazos públicos”. Pola súa banda, Ana Abelleira subliñou a importancia desta programación en termos de “igualdade”.
Programa
Nos meses de xuño, xullo e setembro de 09.00 horas a 14.00 horas celebraranse campamentos urbanos no Colexio Illa Verde. Por unha banda, “xadrez divertido” para cativos de entre 3 e 8 anos para aprender as cuestións básicas; e “xadrez máxico” de nenos de entre 9 e 15 anos con dous grupos: iniciación e perfeccionamiento. Os interesados poden inscribirse no enderezo electrónico xaquedrum@gmail.com ou en 657974937.
Do 1 ao 12 de xuño na Praza Maior de Lugo, poderase gozar de xadrez na rúa, nun taboleiro xigante.
O 8 de xuño ás 18:30 horas na Praza Maior terá lugar unha exhibición de Marta Quintás, a campiona galega sub 14, e unha partida simultánea contra 10 xogadores.
Por último, o sábado 23 e domingo 24 de xuño están programados dous torneos sub 2200. Neste evento, participarán 15 alumnos e alumnas da Escola Lucense de Xadrez.
