O Concello de Lugo reclamou á Xunta que execute de inmediato a recuperación do antigo cuartel de San Fernando, utilizando a partida de 500.000 euros incluída nos orzamentos autonómicos deste ano. O Goberno local quere que o inmoble se converta no futuro Museo da Romanización de Galicia, un proxecto clave para poñer en valor o legado romano da cidade e reforzar o seu papel como referente cultural e patrimonial na comunidade.

A portavoz do PSOE no goberno local, Ana González Abelleira, lamentou que esta infraestrutura leve máis de dez anos pendente e denunciou a falta de coordinación política para sacar adiante un proxecto con fondos xa aprobados. A edil criticou tamén o contraste co investimento de máis de 17 millóns de euros no Pazo de Lourizán, en Pontevedra, destacando a disparidade e a “discriminación” cara á cidade de Lugo.

Por outra banda, a concelleira de Cultura, Turismo e Promoción da Lingua, Maite Ferreiro, instou á Xunta a acelerar os traballos na Catedral de Lugo, que levan desde febreiro, para que a praza de Santa María estea dispoñible de cara ás festas de San Froilán. O proxecto, con un orzamento de 451.001,94 euros, céntrase na reparación de humidades na cabeceira do templo, e Ferreiro subliñou a necesidade de garantir que as obras non comprometan as celebracións patronais.