O Concello de Lugo e o PP protagonizaron nas últimas horas unha lea pola presentación do Arde Lvcus en Fitur, un acto que preparaba a Xunta de Galicia “ás costas” do Concello, segundo apunta o Goberno local. Unha actitude que o PP tacha de “sectarismo político”. Explica nun comunicado o grupo popular municipal que a Alcaldía e a concellaría de mocidade mostrou a súa desconformidade co acto previsto pola Administración autonómica para divulgar o Arde Lvcus en Madrid, na feira Fitur.
Esta mesma postura expresouna o Concello nun comunicado este martes, onde criticou a “falta de lealdade e transparencia” da Xunta con esta actividade. Pola súa banda, o concelleiro popular Javier Vázquez lamentou que a “confrontación constante” converteuse na “marca” do Goberno de Lugo. “Xa estabamos adoitados á crispación que PSOE e BNG fan contra a Xunta para tapar as súas medias verdades. Pero agora sorpréndennos e dan un paso máis: torpedean unha acción positiva, por sectarismo político, e cancelan unha proposta que pretendía dar visibilidade ao Arde Lvcus”, argumenta.
Explican que a iniciativa consistía en levar ás tropas do Arde Lvcus a desfilar en Madrid e participar nunha recepción en Fitur. “Era unha gran oportunidade para promocionar o evento e a cidade”, insistiu Vázquez. “O Arde Lvcus é moito máis que unha festa. É o símbolo do noso orgullo como lucenses e unha riqueza inmaterial que pertence a todos nós. Esta festa non é patrimonio de ningún partido político, non ten nin pai nin nai, é de todos”, aseverou, destacando ademais que se trata dunha iniciativa que parte das propias asociacións implicadas no evento.
CONCELLO
Este é precisamente o argumento que esgrime o Concello, que recalca que o Arde Lvcus é unha festa “municipal”, “non é nin do PSOE nin do PP, nin tampouco é ou debería ser, unha festa en venda”. “A verdadeira vontade de contribuír ao mantemento, proxección e difusión desta festa pasa, como toda colaboración institucional, pola lealdade e pola transparencia, non pola organización paralela de eventos alleos e de costas á administración titular que impulsou a celebración”, censuraron. Nesta liña, consideran que o primeiro paso debería ser comunicar directamente ao Concello a preparación de calquera acción promocional relacionada co Arde Lvcus. “Pero, sobre todo, desde o respecto á potestade que as entidades locais temos para escoller os recursos turísticos que se expoñen en Fitur. Algo que non sucedeu”, lamentan.
Apuntan ademais que o custo da celebración en 2024 ascendeu a 633.311 euros dos que 40.000 (6,31 %) corresponden á achega da Xunta, “polo que a súa colaboración pode ter aínda moito percorrido oficial, si así o desexa”. “Unha pena que, como vén ocorrendo en clave local desde os últimos dous anos, a fórmula escollida para facelo sexa fomentando a ruptura e a crispación social, nunca en beneficio do interese xeral, senón coa única estratexia do ‘divide e vencerás'”, conclúen.
