O pleno da Deputación Provincial de Lugo aprobou este martes, co voto a favor de todos os seus membros, demandar á Xunta de Galicia a adopción de medidas urxentes para apoiar ás gandarías de vacún na loita contra o avance da enfermidade hemorráxica epizoótica (EHE) que afecta a numerosas explotacións.
A moción, presentada polo BNG e que contou co respaldo do PP, saíu adiante por unanimidade nunha mostra, apuntaron desde o Grupo Provincial popular, da “sensibilidade” do partido co sector gandeiro galego.
O acordo tivo lugar tan só un día despois de que a Xunta de Galicia anunciase a posta a disposición dunha partida de máis de 5,4 millóns de euros en axudas directas aos gandeiros galegos destinada a paliar as consecuencias da enfermidade e paralelamente á aprobación por parte do Consello de Ministros da distribución de fondos entre as comunidades autónomas por valor de 15 millóns de euros para combater as perdas provocadas pola EHE.
A urxencia de combater os estragos provocados en Galicia pola enfermidade hemorráxica epizoótica foi, con todo, un dos poucos asuntos da orde do día abordados no pleno de setembro da Deputación lucense no que as diferentes forzas políticas alcanzaron un consenso.
Tanto é así que as mocións expostas por socialistas e nacionalistas para reclamar á Xunta de Galicia a suspensión da subida do canon de Sogama aos municipios e a adopción dun novo modelo de xestión de residuos saíron adiante tras dúas votacións igualadas –o PP opúxose á proposta– mercé ao voto de calidade da presidencia.
“Quen está a facer unha mala xestión de Sogama é a Xunta e tamén quen está a queimar unha cantidade de residuos que non debería porque están prohibidos por lei”, denunciou, antes do inicio da sesión, o presidente da Deputación de Lugo, José Tomé, que instou ao presidente da Xunta, Alfonso Rueda, a indicar “de que parte do orzamento” autonómico van saír os fondos comprometidos polo líder do Executivo galego para “suavizar” o impacto da subida.
Neste sentido, a deputada socialista Pilar García Porto demandou á Xunta durante a súa intervención que “se manteña o canon establecido aos municipios galegos de 66 euros por tonelada de residuos xestionada” así como “a anterior bonificación do 15%”, mentres que a deputada Iria Castro (BNG), que cualificou de “tomadura de pelo” e “roubo a man armada” a subida do canon, lamentou o feito de que Galicia sexa “a peor comunidade de España en materia de reciclaxe”.
“FALTA DE PROFESORADO” NOS COLEXIOS
Tamén foi aprobada este martes no pleno da Deputación de Lugo, cos votos a favor de socialistas e nacionalistas e a abstención do PP, unha proposta do Goberno provincial para esixir á Xunta de Galicia medidas para facer fronte ás “carencias detectadas”, ao seu xuízo, no inicio do curso académico, relacionadas fundamentalmente coa “falta de persoal docente” nas escolas.
“Mentres o conselleiro de Educación presume dunha cifra marca de 31.603 profesores, ao longo da xeografía galega centos de familias están a queixarse da falta de docentes”, denunciou, á mantenta da situación coa que arrincou o novo curso escolar en Galicia, a portavoz socialista na Deputación, Pilar García Porto, que subliñou tamén que os cocientes profesor-alumno acordadas a nivel sindical “tampouco se están cumprindo”.
Na proposta aprobada, o Goberno provincial lucense esixe tamén ao Executivo galego que garanta a “presenza de profesores de apoio para os nenos e nenas con necesidades educativas especiais”; que se recupere “a gratuidade dos libros de texto”; que se cubran as “256 prazas docentes que a Xunta deixou sen cubrir”; e que non se deixe de lado aos colexios do rural, baixo o seu punto de vista “os máis prexudicados” da xeografía galega.
A moción exposta polo Grupo Provincial popular para reclamar, pola súa banda, ao Goberno central servizos ferroviarios de calidade para a provincia, defendida no pleno polo portavoz Antonio Ameijide coa intención de que Lugo, indicou, “deixe de ser a provincia máis illada de España en materia ferroviaria”, saíu tamén adiante con 12 votos a favor, 10 en contra e dúas abstencións.
