O PP lucense celebrará este sábado 21 de setembro unha reunión interparlamentaria na que representantes dos grupos populares no Concello, Deputación, Parlamento de Galicia, Congreso dos Deputados e Senado abordarán os retos de Lugo e a súa provincia en materia de comunicacións e mobilidade. O acto, segundo informou a formación nun comunicado, será clausurado pola presidenta provincial, Elena Candia, e a secretaria xeral do PPdeG, Paula Prado.
Baixo o título ‘Por un Lugo mellor conectado’, entre as 9.00 e as 11.00 horas, sucederanse as achegas de distintos grupos da man dun representante que exercerá de portavoz: Ramón Cabarcos (viceportavoz do Grupo Municipal Popular), Antonio Ameijide (portavoz do Grupo Provincial Popular), Cristina Sanz (viceportavoz do Grupo Popular no Parlamento de Galicia), Francisco Conde (deputado lucense do Grupo Popular no Congreso dos Deputados) e José Manuel Barreiro (viceportavoz do Grupo Popular no Senado).
“Despois de acabar o curso político facendo balance, iniciamos novo curso marcando as liñas estratéxicas”, explicou Candia. O encontro servirá para pór en común a actividade dos representantes do Partido Popular nas distintas cámaras para reivindicar mellores infraestruturas viarias e ferroviarias, entre outros asuntos de actualidade.
Senadores, deputados no Congreso, no Parlamento de Galicia, na Deputación e de Lugo e concelleiras do municipio continuarán, subliña o PP de Lugo, desenvolvendo de forma coordinada distintas accións para “esixir conexións para Lugo e a súa provincia ante gobernos de PSOE e BNG que prefiren defender os intereses de Sánchez ou a súa ideoloxía por encima dos intereses dos galegos e lucenses”.
