O BNG sinalou este mércores a un concelleiro de Guntín como un dos tres gandeiros que aceptaron este martes unha condena de nove meses de prisión tras sentar no banco por un delito de explotación laboral contra dous traballadores de nacionalidade marroquí que estaban en situación irregular, e pediu ao PP a súa “expulsión inmediata”.

De feito, este xoves este concelleiro do PP en Guntín, José Vázquez Barreiro, condenado a nove meses de prisión xunto a outros dous gandeiros, por un delito de explotación laboral, presentou a súa renuncia como edil no rexistro municipal.

Segundo informou o PP provincial nun comunicado, Vázquez Barreiro presentou a súa renuncia á acta de concelleira e, por tanto, renuncia a “as obrigacións derivadas da súa condición de membro do goberno local”. No comunicado tamén se expón que o edil comunicou ao alcalde, Ángel Pérez, a súa decisión, “adoptada de forma voluntaria e coa convicción de que é o mellor para non danar a imaxe do Concello, nin do goberno municipal nin do Partido Popular”.

As mesmas fontes tamén avanzaron que o condenado “solicitará a suspensión de militancia” no PP e puntualizaron que “nin a dirección do PP local nin provincial coñecían previamente os feitos nin a situación do ata agora concelleiro”.

ACORDO

Segundo consta no escrito fiscal, a empresa agraria denunciada, situada en Guntín (Lugo), é a Casa do Coxo, á que está vinculado José Vázquez Barreiro, e os outros dous familiares que alcanzaron un acordo xudicial de conformidade que lles supuxo a rebaixa da pena inicial que pedía Fiscalía (tres anos de prisión) e que se completa con indemnizacións aos dous traballadores por un total de 44.000 euros.

Vázquez Barreiro concorreu ás eleccións municipais de maio de 2023 como número cinco da lista do PP que encabezou no seu día María José Gómez, agora conselleira de Medio Rural. E é que Gómez deixou a Alcaldía en mans de Ángel Pérez o pasado mes de abril, cando o presidente da Xunta, Alfonso Rueda, fichouna para o seu novo Goberno.

“A alcaldesa saínte, actual conselleira do Medio Rural, terá que dar explicacións, xa que foi ela quen o elixiu para formar parte da candidatura e os feitos polos que foi xulgado foron anteriores á súa elección”, advertiu o BNG nun comunicado.

O escrito fiscal detalla que un dos traballadores comezou na explotación o día 12 de outubro de 2018, de forma irregular. Polos labores percibía un soldo de 700 euros mensuais, dos que lle descontaban 50 euros polo aloxamento que lle ofrecían nun anexo da explotación. O outro empregado, en idénticas condicións laborais, comezou a traballar o 1 de marzo de 2020 e compartía aloxamento co seu outro compañeiro.

EN AGOSTO DE 2020 Os TRABALLADORES FORON A UNHA CASA DE ACOLLIDA

O Ministerio Público fixo constar que ambos os traballadores asumiron ese calendario laboral contrario á normativa debido á súa situación, xa que eran migrantes, en situación irregular, desconocedores do idioma e sen recursos económicos. Ambos os traballadores prestaron servizo en ata agosto de 2020 cando se marcharon a unha casa de acollida.

Por iso, aos tres gandeiros imputábaselles un delito contra os dereitos dos traballadores polo que Fiscalía solicitaba a pena de tres anos de prisión para cada un, que finalmente se viu reducida tras asumir a culpabilidade os acusados e pechar un acordo de conformidade.