O Partido Popular de Vilalba asegurou que a dimisión da alcaldesa, a socialista Elba Veleiro, meses despois de selar un pacto de goberno con Vilalba Aberta, demostra a “fraxilidade” do bipartito local.

Nun comunicado remitido aos medios despois de que o pasado luns transcendese a dimisión da rexedora, que trasladou ao pleno o seu desexo de reincorporarse ao seu posto como médico no centro de saúde da localidade, os populares cualifican a situación de “tomadura de pelo aos veciños”.

Os populares sinalan que Elba Veleiro era “a cabeza de lista do PSOE” e, como tal, consideran que “se presumía que era unha persoa de peso dentro das filas do PSOE de Vilalba”, así como a “máxima representante do Concello”.

Por iso, lamentan que o municipio sexa noticia pola dimisión da rexedora, un feito que aseguran que “pode reflectir discrepancias entre os socios de goberno, xa que no anterior mandato romperan o seu pacto”. Así as cousas, aínda que o PP traslada o seu respecto á decisión persoal da socialista, sostén que, a nivel político, “serve máis ao PSOE que ao Concello de Vilalba” e inciden nas súas “contradicións”.

Entre outras cuestións, os populares argumentan que tras as eleccións de maio a rexedora manifestou que “dimitir non era o seu estilo”, algo que fixo “poucos meses despois”. “Ou mentía entón cando xa había rumores de que Elba Veleiro renunciaría ou mente agora e si houbo algún motivo” que a levou a tomar esta decisión.