InicioPolíticaDimite a alcaldesa de Vilalba, que volverá ao seu posto como médico...

Dimite a alcaldesa de Vilalba, que volverá ao seu posto como médico no centro de saúde da localidade

O Grupo socialista propón ao número dous, Marta Rouco, como candidata a tomar o bastón de mando.

PUBLICADA O

- Advertisement -

A alcaldesa de Vilalba, a socialista Elba Veleiro, renunciou á súa acta no último pleno ordinario da corporación, no que informou de que volverá ao seu posto como médico no centro de saúde da localidade.

A rexedora logrou converterse tras as eleccións de 2019 na primeira alcaldesa muller na democracia deste municipio lucense tras selar pactos con Vilalba Aberta. No pleno, Elba Veleiro asegurou que chegou o momento de “pór fin” á súa traxectoria política despois de 16 anos. “Teño que comunicar que hoxe entrego a miña acta e poño fin ao meu mandato de alcaldesa”, sostivo.

A rexedora explicou que se trata dunha decisión “tomada coa serenidade, a reflexión e a tranquilidade que dá o traballo feito e a satisfacción de entregar o mellor de si nestes anos”. Entre os motivos que esgrimiu, destacou cumprir as responsabilidades que asumiu ao comezo da súa andanza, ao conseguir dúas alcaldías progresistas. Ademais, trasladou o seu desexo de terminar a súa vida laboral no centro de saúde. “Xa sabedes que desde finais do ano pasado ninguén cobre a miña cota de pacientes”, sinalou para subliñar que a súa prioridade sempre foi “servir ás persoas”.

SUBSTITUCIÓN

Noutro comunicado, os socialistas de Vilalba apuntan que a proposta do Grupo Municipal Socialista sinala á actual secretaria de organización da Agrupación e segunda tenente de alcaldesa, Marta Rouco, para coller a substitución na alcaldía, unha cuestión que sinalan que foi ratificada por unanimidade pola executiva local.

Os socialistas destacan que sitúan ao número dous nos pasados comicios electorais como a responsable de asumir o bastón de mando “pola súa capacidade de xestión, experiencia na administración local e coñecemento da realidade social vilalbesa”. Con esta decisión, indicaron que o PSOE asegura a continuidade da acción política progresista no concello, “sempre coa perspectiva de alcanzar as mellores condicións de vida para a maioría das persoas”.

Marta Rouco, natural de Goiriz, é licenciada en Ciencias Políticas e da Administración pola USC, cun máster en Administración Financeira e Tributaria expedido pola mesma universidade.

RECOÑECEMENTO DO PSOE PROVINCIAL

Pola súa banda, o PSOE provincial trasladou a Europa Press que respecta a decisión da rexedora de incorporarse á súa profesión antes de xubilarse para finalizar a súa traxectoria laboral. A dirección provincial puxo en valor que Elba Veleiro conseguiu para o PSOE a alcaldía de Vilalba, un cargo que conseguiu revalidar, “demostrando a súa valía como xestora”.

“Desexamos toda a sorte na súa vida persoal e profesional e esperamos que siga participando na vida do PSOE e do concello, que é un activo moi importante”, sinalou.

ÚLTIMAS

A Deputación de Lugo acusa os bombeiros de incumprir servizos mínimos en Vilalba e ameaza con accións xudiciais

A Deputación de Lugo acusa os bombeiros do parque de Vilalba de incumprir os servizos mínimos...

O PP de Lugo presenta trinta propostas para os orzamentos municipais de 2024

A presidenta do PP de Lugo, Elena Candia, explicou a batería de propostas que...

Un condutor dá positivo en alcol e drogas tras sufrir un accidente en Lugo

Axentes da Policía Local de Lugo foron mobilizados en pasado martes por mor dun accidente de tráfico rexistrado...

Traballadoras da limpeza dea Lugo protestan ante o Parlamento pedindo a mediación da Xunta

Traballadores do sector da limpeza de Lugo trasladaron a súa protesta este martes ás...