O portavoz do PP na Deputación de Lugo, Javier Castiñeira, lamenta que o secretario xeral do PSdeG, Gonzalo Caballero “use” ao presidente provincial, o socialista José Tomé, “ante a súa incapacidade para facer oposición” a Alberto Núñez Feijóo.

Así se pronuncia o popular lucense a través dunha nota de prensa, despois das declaracións de José Tomé este mesmo martes a fío da data electoral. Para o presidente provincial, esa decisión “obedece máis ben a unha estratexia” do PPdeG e de Feijóo que “a unha necesidade” dos galegos nestes momentos.

Neste contexto, Javier Castiñeira dixo que “sería lamentable” que un home “coa experiencia política” de José Tomé “caese ao nivel demostrado” polo líder do PSdeG. “O señor Caballero non se aclara, vive nunha contradición permanente instalado nunha realidade virtual que pouco ou nada ten que ver coa realidade dos galegos”, engade.

Ademais, o portavoz popular na Deputación lucense cre que isto é froito de que Caballero “como oposición non ten capacidade para enfrontarse a debates” co presidente do PPdeG e da Xunta, e “moito menos para competir electoralmente”. Por iso “bota man, cando pode, de Tomé para tentar dar ás súas mensaxes a credibilidade que saben que non ten”.

Castiñeira, sobre a data electoral, di que “a inmensa maioría” dos galegos saben que Feijóo “non tomaría ningunha decisión con posibilidades de polos en perigo”. “E tamén saben, despois de ver como actúa o Goberno de Pedro Sánchez, que os socialistas non son nada fiables”, continúa.