EFE.- O presidente de Suplusa e alcalde de Becerreá, Manuel Martínez, indicou que “lle estraña” a decisión do PP na Deputación ao apoiar a disolución da sociedade urbanística provincial pactada polo bipartito (PSOE e BNG). Martínez asegurou que “non entende” este cambio de postura dos populares.
Nun acordo asinado este mércores por representantes dos tres partidos que conforman o organismo provincial -PP, PSdeG-PSOE e BNG-, decidiuse convocar un pleno extraordinario o próximo 12 de setembro para iniciar o procedemento “que desembocará na desaparición da entidade”. O aínda presidente de Suplusa valorou esta resolución como “unha decisión política” que non quixo cuestionar, pero tamén manifestou “non entender” o apoio mostrado polo Partido Popular á mesma. “Estráñame o seu cambio de postura, pois durante estes catro anos defenderon a Suplusa e agora parece que están de acordo coa Deputación”, indicou Martínez.
DEFENDE O PAPEL DE SUPLUSA
O máximo responsable da sociedade urbanística sinalou así mesmo que a entidade ten “un papel importante que cumprir, como o mantemento das áreas verdes”. “Se non o fixese, estes espazos estarían como as estradas da Deputación, que están sen rozar no mes de agosto”, apuntou Martínez. Tamén destacou que unha entidade deste tipo “permite unha maior axilidade á administración, o que supón un beneficio para a sociedade lucense”.
QUE PASA COS EMPREGADOS?
Martínez tamén mostrou a súa “preocupación” polo futuro dos 30 traballadores da sociedade, “que traballaron con esforzo e de forma legal”. Quixo sinalar así mesmo que “se son subrogados pola Deputación non adelgazan a administración, tal e como nos queren vender desde o executivo”. “É fume, propaganda política que se enraíza na liña de criminalización de Suplusa que levaron nos últimos anos”, denunciou Martínez.
