O Centro Comercial Carrefour de Lugo deberá indemnizar a unha empregada por atentar contra o dereito á conciliación laboral e familiar. A sentenza do Xulgado do Social Número 2 ditamina que a empresa reduciu unilateralmente a xornada á muller, represaliada por declinar un cambio de horario proposto pola empresa.

A medida tivo consecuencias morais e económicas polas que a empresa deberá resarcir á afectada. Segundo a Confederación Intersindical Galega, a muller negárase a aceptar a nova distribución de horas porque lle impedía ver aos seus fillos máis que para levalos ao colexio. Como resposta á negativa, Carrefour decidiu reducirlle a xornada laboral.

Para a central sindical, o proceder amosa a “insensibilidade da empresa co exercicio dun dereito tan básico como é a conciliación”, manifestando a situación de discriminación que sufren as mulleres no mercado laboral. Así, convidan “a todas as compañeiras non ceder ás presións e ameazas da empresa” e defender os dereitos laborais.