O rural, ou parte del, comeza a organizarse xa con vistas a organizarse coma partido político. O vindeiro sábado, 7 de maio, en Antas de Ulla, haberá unha nova xuntanza do movemento cidadán Interior Galego Vivo (IGV), que leva desde 2015 organizando distintas protestas por falta de infraestruturas no rural.
Era o 4 de maio do 2019 en Belesar cando dez candidaturas municipalistas do interior galego comprometíanse de xeito público a traballar cooperativamente en alternativas de vida e traballo digno para as comarcas do interior galego. Dende aquel entón, o colectivo non deixou de medrar e comezou a promover e integrar diferentes liñas de traballo a través da colaboración entre os diferentes concellos con representación na plataforma.
“Unha formación social e política para facer fronte ao despoboamento que induciron nas nosas parroquias e vilas do interior; para confrontar os desequilibrios territoriais; para deter as agresións ao territorio e pular pola mellora da súa ordenación”, indica Interior Galego Vivo nun comunicado. O seu obxectivo é denunciar a mingua ou supresión de servizos nas comarcas envellecidas, “que deterioran as condicións de vida das nosas xentes e que negan oportunidades formativas e laborais á nosa mocidade”.
Nesta V asemblea de Antas darase prioridade a construción dunha ferramenta organizativa que poida tamén presentarse ás vindeiras eleccións municipais. “É vital tecer rede con diferentes colectivos e persoas e construír unha organización cunha dinámica regular que elabore na praxe un programa común e alternativas para actuar na instancia política a prol da nosa xente e da nosa Terra”, indica.
Nesta xornada, ademais, falarase de agrogandeiría, coidados, vivenda, transporte, fondos next generation, lecer, xuventude e soberanía alimentar. Cada mesa aborda varios temas que comparten aspectos entre sí, para que, dese xeito, tamén as propostas verquidas poidan ser entendidas dun xeito global. Xa á tarde, a xuntanza rematará cunha posta en común de conclusións do traballo da mañá e tamén unha pequena camiñada polas terras da Ulloa.
