O deputado lucense e portavoz de Industria e Turismo do Grupo Popular no Congreso, Francisco Conde, solicitou unha declaración institucional en apoio a “unha iniciativa para proxectar un dos patrimonios culturais e paisaxísticos máis relevantes do país” despois de que o conselleiro de Cultura, Lingua e Xuventude, José Campos, comparecera na Cámara Baixa para presentar a candidatura da ‘Ribeira Sacra: Paisaxe da Auga’ a Patrimonio Mundial da UNESCO achegando os “seus elementos singulares” a tódolos grupos parlamentarios.
Francisco Conde avogou por “unir os esforzos de tódolos grupos que formamos parte do Congreso en torno a unha candidatura que será a única que presente España ante o Comité de Patrimonio Mundial da UNESCO o vindeiro mes de xullo”.
A candidatura esixiu tamén “un esforzo colectivo e o compromiso de todos”: administracións -especialmente da Xunta de Galicia e do Ministerio de Cultura polo impulso á candidatura-, institucións, axentes económicos e sociais, agricultores, gandeiros, viticultores, bodegueiros, artesáns e cidadáns en xeral. Así, o popular agradeceu todos estes esforzos para “a posta en valor do noso patrimonio e da nosa cultura que forma parte da nosa identidade”. Nese sentido, citou a vinculación da Ribeira Sacra coa viticultura heroica e o patrimonio románico.
Conde recoñece “o talento dun pobo que durante séculos soubo fusionar a paisaxe e a actividade económica e o seu esforzo para converter a viticultura nunha das principais fontes de riqueza da Ribeira Sacra e nun dos principais potenciais para consolidar o noso futuro”.
Tamén subliñou “o esforzo da Xunta de Galicia no coidado e protección do noso patrimonio” para “garantir a pervivencia dos seus valores e atributos” a través da declaración da Ribeira Sacra como Ben de Interese Cultural de forma que “sexa compatible a protección coa actividade económica e o respecto ao medio ambiente”.
O deputado monfortino asegurou que “somos conscientes da oportunidade que pode supoñer para a Ribeira Sacra a Declaración como Patrimonio da Humanidade dende o punto de vista económico e turístico, pero tamén para a proxección da imaxe de Galicia no contexto internacional”.
Conde trasladou na súa intervención que a Ribeira Sacra é un lugar que merece a pena desfrutar e fixo gala da súa terra convidando a todos os membros da Comisión de Industria e Turismo a visitala.
