A Plataforma Ulloa Viva, un dos principais colectivos que se opoñen á instalación da factoría de Altri en Palas de Rei, alerta da vinculación dos incendios que arrasan miles de hectáreas en Portugal coa proliferación das plantacións de eucaliptos e a industria pasteira.

“Non imos consentir que isto pase tamén en Galicia e un goberno da Xunta responsable tampouco o permitiría”, sinalou esta plataforma nun comunicado no que lembra que o país veciño xa viviu, en 2017, unha vaga de incendios con vítimas mortais que en boa parte debeuse ao “modelo forestal que as súas industrias pasteiras implementaron”. De feito, mencionan dúas empresas: Altri e Navigator.

Neste sentido, Ulloa Viva lembra que a fábrica de fibras téxtiles e pasteira que se instalaría en Pas empregaría 1,2 millóns de toneladas de eucalipto ao ano. Ademais, o informe do Consello da Cultura Galega advertiu que habería que plantar outras 190.000 hectáreas máis desta especie, un modelo que en Portugal “arrasa o territorio e mesmo as vidas” dos veciños.

Así mesmo, nunha semana na que o secretario xeral do PSdeG, José Ramón Gómez Besteiro, situouse claramente en contra da instalación desta planta, a plataforma critica á Xunta por quedar “soa” na defensa do proxecto industrial.

Por iso, pide ao presidente galego, Alfonso Rueda, e a todo o seu goberno que “se poña ao lado dos técnicos, dos científicos e dos veciños” e “que atenda a todas as voces que lle están advertindo dos perigos deste proxecto e refugue dunha vez por todas” a “macrucelulosa” de Altri en Pas.

DENUNCIA DE ANA MIRANDA NA EUROCÁMARA

Por outra banda, este martes a eurodeputada do BNG, Ana Miranda, denunciou no pleno da Eurocámara que o PP “manobra” na Comisión de Peticións para que as denuncias de Ulloa Viva presentadas contra este proxecto industrial non sexan debatidas no órgano o 3 de outubro pola vía de urxencia.

A representante nacionalista asegura que hai “intentos” do PP, tanto o galego como o estatal, para impedir que estas persoas acudan “a comparecer e ser escoitadas” no Parlamento Europeo, porque os populares –engadiu– prefiren “escoitar ás multinacionais que aos membros da Plataforma Ulloa Viva”.