Novos achados no xacemento do S.IX AC localizado en Penas do Castelo, parroquia de Salcedo, na Pobra do Brollón apuntan a que un lume podería provocar o colapso de edificacións. Este venres, o delegado territorial da Xunta, Javier Arias, e o alcalde da Pobra, Xosé Lois Maceda, visitaron o xacemento para ver de primeira man os novos achados.
Segundo explica o concello nun comunicado, a campaña, a cuarta xa no xacemento, ten dous obxectivos. Por unha banda, “consolidar as partes máis expostas da muralla” e, por outro, escavar unha gran sonda no interior do xacemento. É precisamente esta sonda interior a que revelou os últimos avances.
Ata o momento, apuntan, sabíase que da existencia dun xacemento complexo, de tipoloxía “pouco común” e cunha muralla monumental. Apuntan que foi nos traballos da muralla onde se puideron realizar, na campaña de 2021, dataciones por radiocarbono que resultaron en torno ao século IX AC, é dicir, da época en que se empezan a construír os primeiros castros.
Na campaña actual, ampliouse unha pequena sonda previa no interior do xacemento na que aparecera un nivel de derrube de pallabarro (construción que mestura palla e barro), onde agora se está obtendo nova información.
NOVAS VASIJAS E FRAGMENTOS
Ao comezar a retirar o nivel derrubado, aparece unha “boa cantidade” de fragmentos cerámicos en “un moi bo estado de conservación”. Trátase de dúas vasijas cerámicas practicamente completos e outra gran cantidade de fragmentos por determinar. Ademais, nun deles aparecen grans de cereal por determinar e restos concrecionados nas paredes interiores do mesmo.
Os restos de sementes, así como as concrecións e numerosos carbonos serán estudados e analizados en laboratorio. Destacan que poderían achegar dataciones para o momento de uso do xacemento. Os fragmentos cerámicos serán tratados pola restauradora Alba Losada, que tentará reconstruír as pezas e a partir de aí, poder coñecer a súa tipoloxía e cronoloxía.
“Estes achados son fundamentais para entender mellor o xacemento“, apuntan desde o equipo arqueolóxico. “O que nos contan por agora é que no lugar debeu de haber un lume que fixo colapsar as paredes de pallabarro. Esta parede cae sobre o que había no interior desta edificación, deixándoo todo selado e nun gran estado de conservación”, explican.
Os traballos continuarán durante a próxima semana, cando se retirará o nivel de pallabarro. Lembran que a escavación pode visitarse por parte do público xeral en horario de mañá, confirmando a visita no teléfono 622952078.
