A Garda Civil investiga a un veciño de Melide, de 33 anos de idade, como suposto autor dun delito continuado de incendio forestal, por incendios rexistrados en agosto do ano pasado na zona de Serra do Careón en Palas de Rei. Os axentes do Equipo Multidisciplinar de Investigación de Incendios Forestais (EMIIF) iniciaron as pescudas tras a reiteración de incendios nesa zona.

Para iso valéronse do uso de novas tecnoloxías aplicadas á investigación das causas de incendios forestais e, tras case un ano de traballo, puideron comprobar que eses lumes se iniciaban pola aplicación dunha fonte calorífica nunhas áreas previamente delimitadas pola persoa investigada. A investigación foi dirixida e coordinada polo xulgado de instrución 1 de Chantada.