En xuño de 1999 comezáronse as obras do Vicerreitorado e desde aquel momento ata o de agora a Rúa do Moucho está pechada ao paso. Así o denuncia Lugo Monumental que lembra que esta rúa é significativa porque non só é parte do paseo interior da Muralla senón que está a escasos metros do monólito que sinaliza os tres patrimonios da Humanidade da cidade.
Ademais, critica que o valo que pecha o paso e o apontoamento dunha casa particular están apoiados nada menos que na propia Muralla Romana de Lugo. Lugo Monumental puxo en coñecemento do Concello e a Xunta de Galicia este tema en maio de 2022 sen que ata o momento houbese movemento algún, polo que reitera a súa denuncia ante ambas as administracións.
“A poucos meses de cumprirse 25 anos de parálises, a rúa segue pechada ao tránsito peonil, algo que non pode menos que causar estupor pola desidia e deixamento que as administracións implicadas están a ter respecto a este asunto. Por moito que a casa en cuestión sexa de titularidade particular, a afectación ao paso por unha rúa durante lustros converte esta cuestión nun asunto público”, denuncia a entidade.
Ante esta situación a Asociación reitera as súas denuncias e non descarta levar a cabo outras accións para lograr desbloquear este asunto.
