Un xulgado e Fiscalía abriron dilixencias previas para investigar a talla de sete árbores centenarias na contorna do Fogar de Santa María, en Lugo, por parte dunha empresa contratada pola Deputación. Os feitos, que foron denunciados por Ecoloxistas en Acción Galiza Atlántica e Verde, sucederon desde a mañá do sábado.
E é que o pasado mes de maio a Dirección Xeral de Patrimonio Natural da Xunta paralizara esta actuación no antigo hospital por constatar que había presenza de niños e restos de ovos nestas árbores situadas onde está proxectado un aparcadoiro con 165 prazas, nunha zona próxima á Muralla.
Fontes da a Deputación de Lugo consultadas por Europa Press remarcan que esta talla, acometida desde o sábado, decidiuse acometer “por problemas mecánicos” coas ramas e que se fixo “en beneficio de todos os veciños”. Ademais, o goberno provincial confirma que aínda non recibiu ningunha notificación, polo que descoñece se hai ou non unha investigación en curso.
EN MAIO PARALIZOUSE A ACTUACIÓN
Ao parecer, despois de que a Administración autonómica ordenase parar a actuación en maio, a Deputación avisou o pasado venres pola tarde (día 18 de agosto) á Delegación Territorial en Lugo de que ía proceder a esta talla. Con todo, fontes da Xunta explican que, debido ao horario de verán, non foi ata o luns cando se leu dita comunicación.
Por iso, segundo as mesmas fontes, á primeira hora da mañá do sábado, día 19, renováronse os traballos. Os axentes ambientais tentaron acceder á zona para comprobar o estado da fauna, pero a Deputación “denegou o acceso”. O luns, tal e como relatan, si puideron entrar acompañados da Policía Autonómica.
Desde Ecoloxistas en Acción Galiza Atlántica e Verde, a súa presidenta, Nery Díaz, explica a Europa Press que o mesmo sábado acudiron ao xulgado de garda a denuncialo. Desta forma, notificóuselles que podía haber indicios dun posible delito contra a flora e reclamou tanto á Policía Nacional como ao Servizo de Protección da Natureza (Seprona) da Garda Civil que “con carácter urxente” soliciten a información precisa para esclarecer os feitos.
“OBVIÁRONSE AS MEDIDAS DE PROTECCIÓN”
Díaz advirte que a Deputación “non pode facer así” esta talla de árbores centenarias xunto á Muralla de Lugo, con todas as figuras de protección do patrimonio coas que conta. “Obviáronse todas as medidas de protección que ten”, sinala.
Con todo, a presidenta de Ecoloxistas en Acción Galiza Atlántica e Verde non resta responsabilidade á Xunta, dado que “ten competencias” non só para a protección da avifauna, senón tamén do “seu hábitat”. Por iso, quéixase de que ningunha das tres adminitracións (nin a autonómica, nin a provincial, nin a local) respondesen aos requerimentos que lles fixo esta entidade nos últimos tres meses.
O PP APUNTA AO PRESIDENTE DA DEPUTACIÓN
A nivel político, a reacción do PP (grupo da oposición na Deputación) non se fixo esperar. Así, o portavoz do Grupo Popular provincial, Antonio Ameijide, acusa o presidente, o socialista José Tomé, de “pretender estar por encima do ben e do mal e pensar que pode saltarse a lei”.
Así, o PP quere saber “que responsabilidades pode ter” o goberno bipartito de PSOE e BNG nesta cuestión, polo cal esixirá “explicacións” por esta talla, así como ter acceso ao expediente de contratación para saber se a Deputación contaba cos permisos ou autorizacións pertinentes. De feito, Ameijide xa manifestara o sábado as súas reticencias ante esta obra nun sábado de agosto “pola porta de atrás, coma se quixéseno facer ás agachadas”.
