A Sección Segunda da Sala do Contencioso-administrativo do Tribunal Superior de Xustiza de Galicia (TSXG) desestimou senllos recursos da empresa Erimsa contra a negativa en primeira instancia a proxectos mineiros de cuarzo na comarca lucense de Terra Chá.
Nun comunicado, a Comisión contra as Minas da Terra Chá -integrada por unha vintena de colectivos sociais, sindicais e veciñais da comarca-, remarca que as pretensións de Erimsa con estes litixios contra o Concello de Cospeito era reactivar un procedemento iniciado en 2008 e, “por tanto, caducado“, para obter autorización para a súa actividade.
Respecto diso, as sentenzas remarcan que é incuestionable que o expediente de autorización autonómica previa terminou cunha resolución firme desestimatoria. E é que esta empresa de capital chinés e domicilio en Noruega non emendou deficiencias como a falta de informes sectoriais favorables por parte de diversos departamento da Xunta.
Segundo explica a Comisión contra as Minas da Terra Chá estas sentenzas súmanse ás ditadas en 2016, nas que se lles denegaba licenza municipal para as concesións Alicia e Karle, en Castro de Rei e Cospeito, previa denegación da autorización autonómica.
