A Consellería de Medio Ambiente reactivou a convocatoria das axudas para o financiamento de actuacións municipais nos concellos que se inscriben dentro dunha Reserva da Biosfera ou do ámbito dos Parques Naturais de Galicia. Na provincia de Lugo, beneficiaríanse os concellos incluídos na reserva de Terras do Miño; na dos Ancares Lucenses, Montes de Cervantes, Navia e Becerreá; e na do río Eo, Oscos e Terras do Burón.
O DOG publica este xoves a resolución pola que se dispón a continuidade de toda unha serie de liñas de subvencións da Dirección Xeral de Patrimonio Natural, cuxos prazos administrativos e de prescrición e caducidade víronse afectados polo Real decreto polo que se declarou o estado de alarma.
Este é o caso das axudas para a realización de estudos e investimentos vinculados á conservación, recuperación e rehabilitación do patrimonio natural e cultural e á sensibilización ecolóxica nos espazos da Rede de Reservas da Biosfera de Galicia. É a segunda vez que se convocan e que están dotadas con 600.000 euros.
