A Policía Local de Lugo interveu nos últimos días en varios incidentes rexistrados en establecementos de hostalaría da cidade, entre eles dous episodios de agresións, ademais de prestar asistencia en seis actuacións de carácter sanitario e social relacionadas con caídas, intoxicacións etílicas e problemas médicos sobrevindos na vía pública e domicilios particulares.
Un dos sucesos tivo lugar nun establecemento de hostalaría da Avenida da Coruña, onde unha muller denunciou ser agredida mentres se atopaba consumindo no local. Segundo manifestou aos axentes, dúas mulleres achegáronse a ela e comezaron a insultala antes de propinarlle unha labazada e romperlle a camiseta que vestía. As presuntas agresoras, que ían acompañadas de varios menores, abandonaron o establecemento antes da chegada da patrulla.
Os axentes comprobaron que a vítima presentaba inflamación visible no pómulo esquerdo, ademais de danos evidentes na roupa. Un traballador do local confirmou presenciar a agresión e os policías constataron tamén a existencia de cámaras de videovigilancia no interior do establecemento. A muller foi informada os trámites necesarios para formalizar a correspondente denuncia e solicitar as gravacións de seguridade.
Noutra intervención desenvolvida nun local de hostalaría do centro da cidade, dúas mulleres protagonizaron unha pelexa que obrigou a requirir presenza policial despois de que ambas negásense a abandonar o establecemento ata a chegada dos axentes.
Cada unha das implicadas responsabilizou á outra do inicio da agresión. Unha delas mostrou aos policías un guecho de cabelo que, segundo asegurou, fóralle arrincado durante a liorta, mentres que a outra afirmou recibir un golpe no rostro sen provocación previa. Ambas foron informadas o seu dereito a presentar denuncia e achegar, no seu caso, parte médico de lesións. Finalmente, abandonaron o local sen que se rexistrasen novos incidentes.
SEIS INTERVENCIÓNS ASISTENCIAIS
Ademais destas actuacións, a Policía Local atendeu nos últimos días seis requirimentos de carácter asistencial en distintos puntos da cidade. En dúas ocasións, os axentes acudiron a domicilios particulares onde persoas de avanzada idade sufriran caídas e eran incapaces de levantarse polos seus propios medios. Os efectivos lograron auxilialas e colocalas en condicións seguras, sen que presentasen lesións aparentes derivadas dos accidentes domésticos.
Noutra intervención, unha patrulla localizou na vía pública a unha persoa maior con serias dificultades para manterse en pé. Varias persoas permanecían xunto a ela cando chegaron os axentes. A afectada manifestou sufrir fortes mareos e, tras solicitar asistencia sanitaria, o persoal do 061 comprobou que presentaba un nivel moi elevado de azucre en sangue, sendo trasladada posteriormente ao Hospital Universitario Lucus Augusti (HULA).
Tamén nas inmediacións da Rolda da Muralla, á altura do edificio administrativo da Xunta de Galicia, os policías auxiliaron a un home de mediana idade que presentaba o rostro ensanguentado e síntomas evidentes de embriaguez. Segundo relatou, sufrira dúas caídas debido a unha intensa dor renal, provocándose feridas sanguentas tanto na cella como na caluga. Tras ser atendido polos servizos sanitarios, foi evacuado ao HULA para recibir tratamento médico.
Noutro servizo, os axentes atoparon a un home tombado na vía pública con claros signos de consumir alcol. Aínda que aceptou axuda para incorporarse, rexeitou reiteradamente tanto a asistencia sanitaria como a posibilidade de pasar a noite no albergue municipal. Dado que se atopaba consciente, orientado e sen risco inminente para a súa integridade, a patrulla abandonou o lugar tras deixar constancia da actuación.
A última das intervencións asistenciais produciuse fronte á estación de autobuses, onde a parella dun home solicitou axuda ao atoparse este afectado dunha forte dor no peito irradiado cara ás costas. Mentres se esperaba a chegada da ambulancia, un médico do servizo de urxencias contactou telefonicamente cos axentes para solicitar información sobre o estado do afectado. Finalmente, o home foi trasladado ao HULA acompañado da súa parella para unha avaliación médica completa.
