O gran recibimento celebrarase o sábado, mais a figura do Apalpador está presente dende o 12 de decembro en Lugo. Así o procurou a rede cultural da cidade a través da colaboración coas librarías Trama e Biblos e a Biblioteca Pública Municipal, divulgando o lendario nos días previos á chegada do xigante do Courel.
A benvida ao Apalpador reintroduce no ámbito urbano a celebración propia da cultura ancestral galega, como alternativa a outras tradicións de orixe foránea. Asemade, supón unha oportunidade para estabelecer lazos entre as familias de Lugo, reforzando o tecido social.
Este proxecto de animación e socialización da figura infantil do Apalpador é iniciativa da Semente Lugo, canda á Mesa Pola Normalización Lingüística, CS Mádia Leva, A Volta do Agro, Cántigas e Frores, O’Xeito, Troupelear, Tradescola e Lucecús Teatro. A programación conta co soporte de Concello e Deputación.
Grazas a este impulso, durante todo o mes están dispoñibles –nas citadas librarías e na Biblioteca pública– recursos didácticos, bibliografía e produción cultural editada acerca deste xigante carvoeiro. E na tarde do sábado 22 de decembro, na Praza Maior, Lugo recibirá o Apalpador a partir das 17.00 horas.
Varias sopresas amenizarán os intres previos á benvida, que comezará cunha ruada ás 16.30 horas dende A Milagrosa, pola Avenida da Coruña cara o centro histórico. Dende as 17.00 horas, o primeiro dos obradoiros, Troupelear. Música en familia, con Branca Villares.
Contra as 18.00 chegará o Apalpador, con castañas e agasallos, para continuar a festa cos obradoiros de O’Xeito e Tradescola. Pechará a xornada a foliada con A Volta do Agro e Cántigas e Frores.
O videoclip da canción do Apalpador
A Escola de Ensino Galego Semente de Compostela presenta, coa colaboración do Concello de Compostela, un proxecto de animación e socialización infantil do Apalpador, para fomentar a participación da cidadanía na visibilización do xigante do Courel. A primeira iniciativa deste proxecto é a divulgación dun videoclip.
