O taller de coiro de Santiago Besteiro, na localidade lucense de Monterroso, recibiu o Premio Nacional de Artesanía na categoría de Emprendemento, á que tamén optaba o taller de tornería Vikensen, de Tomiño.
Santiago Besteiro adícase ao deseño, desenvolvemento e elaboración de pezas artesás de alta calidade realizadas con materiais naturais e biodegradables. O seu traballo céntrase no coiro combinado con outros materiais como a pedra ou a madeira, primando a investigación con novas formas e materiais, un deseño simple e funcional que busca ofrecer os máis altos estándares de calidade.
No taller mantén dúas liñas de produtos: a marroquinería e as pezas escultóricas e adicadas á decoración de interiores. Actualmente, realiza prototipado e investigación de novos produtos para clientes como Loewe, que en xuño deste mesmo ano 2022 presentou no Salón do Moble de Milán como novo artesán colaborador.
Así mesmo, a Xunta destacou que o taller do monterrosino está recomendado pola guía dixital ‘Homo Faber’, que destaca a excelencia da artesanía europea, e a guía dixital España Artesá, impulsada pola Asociación Contemporánea de Artes e Oficios, que destaca aos mellores artesáns de España. Durante a súa traxectoria xa foi finalista en tres ocasiones dos Premios Artesanía de Galicia (2020, 2021 e 2022) e do European Craft Prize 2021.
Por outra banda, a Fundación Artesanía de Galicia resultou finalista na categoría Promociona para Entidades Públicas, polo seu proxecto ‘Corazón da Artesanía. Encontro da Artesanía Tradicional e popular de Galicia’ que se celebra anualmente na Agolada.
Os Premios Nacionais de Artesanía son convocados anualmente polo Ministerio de Industria, Comercio e Turismo a través da Escola de Organización Industrial (EOI) e da súa área de promoción de artesanía, Fundesarte.
