O tráfico ferroviario de viaxeiros entre Monforte de Lemos e Lugo verase interrompido os próximos días 18 e 19 de decembro debido ás obras de mellora que Adif leva a cabo neste corredor. Renfe estableceu plans alternativos de transporte por estrada para os viaxeiros dos servizos afectados.

Así o informou Adif nun comunicado, no que explica que acometerá durante estes días actuacións en infraestrutura (obras de drenaxe, pasos superiores, noiros de trincheiras e túneles) e en vía para permitir a electrificación do tramo entre Monforte de Lemos e Lugo Mercadorías, de 75 quilómetros de lonxitude.

Para realizar estes traballos, o servizo interromperase desde as 22,30 horas do venres 17 de decembro e ata a madrugada do luns 20, polo que afectará as circulacións ferroviarias de viaxeiros do sábado 18 e o domingo 19 de decembro.

As actuacións de mellora que levan a cabo no tramo en servizo Ourense-Monforte de Lemos-Lugo teñen como obxectivo, sinala Adif, “cumprir os compromisos coa optimización das condicións de explotación comercial do traxecto en parámetros tales como a fiabilidade, o confort e os tempos de viaxe“.

Entre as principais actuacións previstas Adif destaca a adaptación da infraestrutura ás novas condicións de explotación, o cambio de electrificación de 3 kV a 25 kV no tramo Ourense-Monforte de Lemos e a electrificación a 25 kV do tramo Monforte de Lemos-Lugo.

“Todas estas obras contribúen á consecución dos Obxectivos de Desenvolvemento Sustentable (ODS), como é o número 9, que ten entre as súas metas desenvolver infraestruturas fiables, sustentables e de calidade”, conclúe Adif.