O xulgado do social número 2 de Lugo recoñeceu o dereito dun traballador de Carrefour a ampliar a súa xornada laboral de 24 horas semanais a 39, e condena á empresa a abonarlle unha indemnización de máis de 6.000 euros en concepto de lucro cesante, pola diferenza entre o que cobrou e o salario que percibiría se prestase os seus servizos a xornada completa.
O traballador afectado, segundo informa a CIG, leva prestando servizos para Carrefour en Lugo a tempo parcial desde 2004, cunha xornada semanal de 24 horas. Tomou a decisión de presentar denuncia en marzo de 2018, apunta, despois de solicitar á empresa que se lle ampliase a xornada ata en tres ocasións entre maio de 2016 e novembro de 2017.
No entanto, “a cada unha das peticións, a compañía respondeu con silencio e iso a pesar de que nese período producíronse varias vacantes e novas contratacións neste centro de traballo”, segundo reproba a CIG.
O convenio colectivo de grandes almacéns, apunta, establece no seu artigo 9 que, no caso de incremento do persoal ou de existir vacantes a cubrir, en similar función, a igualdade de condicións, os traballadores con contratos a tempo parcial terán preferencia sobre as novas contratacións a tempo completo.
En concreto, o xulgado recoñece o dereito do traballador a ampliar a xornada de traballo con efectos económicos desde o 30 de novembro de 2017, data na que presentou a última solicitude á empresa e condena a Carrefour a abonarlle unha indemnización de case 6.000 euros.
