Axentes da Garda Civil detiveron a dous lucenses por un total de 15 delitos de roubo con forza, cometidos entre outubro de 2020 e xaneiro de 2021 en distintos locais comerciais e hostaleiros de varias localidades da provincia de Lugo.
Segundo informou o Instituto Armado, os feitos ocorreron en establecementos de Castro de Rei, Begonte, Friol, Monforte de Lemos, Meira e Riotorto. Ademais, accederon tamén a un albergue de Portomarín no que se atopaban varios peregrinos.
En canto ao ‘modus operandi’, os autores ían ataviados con pasamontañas e luvas en busca de locais sen alarma sonora. Unha vez alí rompían a fechadura das portas e accedían ao interior en busca de diñeiro en efectivo.
Ademais, no caso de establecementos hostaleiros, subtraían o diñeiro das caixas rexistradoras e dos comecartos e levaban as máquinas de tabaco para posteriormente subtraer noutro lugar tanto o diñeiro como o tabaco do seu interior.
De acordo coa Garda Civil, a actividade delituosa destas persoas “aumentou en datas do Nadal”. Así, chegaron a violar o toque de queda para cometer os feitos delituosos a altas horas da madrugada.
DETENCIÓNS
Froito das investigacións realizadas, a busca dos responsables centrouse nun grupo de mozos asentados na localidade de Lugo. Finalmente, procedeuse á detención dos presuntos responsables o pasado 27 de xaneiro, “cando regresaban da súa actividade delituosa”.
Os detidos foron postos a disposición do Xulgado de Instrución número 1 de Chantada (Lugo), mentres que a investigación continúa aberta ante posibles novas actuacións.
