EFE | A Universidade de Santiago de Compostela (USC) informou de que a granxa experimental do Campus Terra, unha instalación destinada a usos de docencia e investigación que ocupa uns 1.500 metros cadrados no predio Gayoso-Castro, recibiu hoxe a visita dos primeiros estudantes que realizarán as súas prácticas nesas instalacións.
O inicio da actividade formativa na Granxa do Campus Terra, unha instalación experimental impulsada pola USC e financiada pola Deputación de Lugo, ofrece “novas posibilidades” para que os alumnos matriculados na Escola Politécnica Superior e na Facultade de Veterinaria realicen actividades de carácter práctico necesarias para completar a súa formación.
Esas instalacións, que serán inauguradas de forma oficial o vindeiro martes, servirán tamén para “impulsar e desenvolver proxectos de investigación orientados a mellorar a competitividade das explotacións lácteas e, por extensión, do sector agropecuario”.
De feito, coa programación de prácticas aínda sen completar, a vicerreitora de Coordinación do Campus de Lugo, Montserrat Valcárcel, afirmou que “a Granxa do Campus Terra bota a andar coa aspiración de converterse nun referente da innovación para o sector agropecuario e gandeiro”.
Nas súas instalacións conta cunha nave para gando con capacidade para unhas 70 vacas de leite e está dotada con computador de muxido, laboratorios, aulas de formación, maquinaria diversa e terreos aptos para cultivos.
Aberta a toda a comunidade universitaria, así como aos gandeiros e demais axentes do sector, a Granxa do Campus Terra supón un “salto cualitativo importante para a formación práctica” dos alumnos. Valcárcel afirmou que a primeira práctica desenvolvida na granxa por alumnos de Veterinaria, coordinada polo profesor Luis Quintela, “reforza o camiño da especialización da sede universitaria lucense”.